يا شعب واخد ع التعب
كفايك سكوت
من أمتى كان زهرك لعب
و مليت جيوبك بنكنوت
ترجع تقول دهو سرق ودهو نهب
وبنو البيوت
بس احنا مالنا
ما احنا فى حالنا
تعبنا موت
لاااا
غلطان يا صاحبى
د هوا مالنا و برده حالنا
علشان عيالنا
لأجيال تفوت
اصل الحكاية
زهقنا منها .
فى كل دورة لما يلفو
علشان يغشو
الطيبين .
وعلى القهاوى صاحبنا ناوى
يكون نايبنا فى البرلمان
ما هو اصله غاوى
يدارى فى بلاوى
عن اللى جنبه
لكن دى عندى اكيد تبان
وفى المعازى
عمال يرازى
بسلام كتير
وبحضن جامد على الصغير قبل الكبير
واكله العشم
بس بغشم
لما اتشتم
وريحتة وحشة والكل شم
والست هانم
فوق ع السلالم
عماله ترمى فى وعود خيال
جايبة معاها الفرقة ديه
ملياها هى اشباه رجال
يطبلو لها ويصقفولها .
ما هى اصلا لعبة عيال
و هناك يتاجرو بالغلابة
ويشحنوهم فى ميكروباص
يلفو بيهم و يبقو فرجة
ويقول لهم جالكو الخلاص
واللى بيلعب على الحريم
واللى يغنى على الشباب
واللى بيضرب فى الصميم
يلعن تمللى عيشته الهباب
خد بالك يا صاحبى وافهم تمام
خليك مركز و إياك تنام
صحصح وفوق و من المجرب إسمع كلام
فيه الخلاصة و يا الدراسة خبرة زمان
اصل السياسة لعبة كياسة
مش بالكلام ولا بالسلام
ولا هى خدمة نمد إيدنا
لتأشيرة فالصو ملهاش ضمان
