شاب الشباب

شب الولاد بالأمل

لكن الشباب اه شاب

مستنى يوم فيه عمل

توبه المرقع داب 

هتفيد يإيه يا ندم 

وتفيد بإيه يا عتاب

وظيفة من غير تعب

حلمك د اصله سراب

لازم فى يوم من عرق 

و العمر لو يتسرق تبقى حياته عذاب

قاعد على القهوة من امتى مستنى

نفسك بقى.تغنى قوم قولنا الاسباب

د انت محصلتش لا نحلة ولا نملة

من غير ولا مجاملة انت ملكش احباب

بالحق تنصح لك بالحب تفرح لك تفتح لك الأبواب

استرجل

عاجبك شكلك انتِى وهو

أرجوزه وجوزك أرجوز

ما هو عيب لو عيب يطلع من جوه

جايز ممكن مرة يجوز

إنما يتكرر اكتر من مره

و الاقيكو فى جره  لأ

راح تطلعو بره

وأنت يا.غلبان يا مصدق نفسك

قاعد سرحان والكل اه كسفك

طب بص لنفسك جوه مرايتك فى الحمام

حتلاقى فراغ تافه عمال بيرتب اى كلام

والست بديعة نجمة مسرحها

بتلف الحبل هتلاقى مصرعها

نفسها  تتبروز تطلع فى الصورة

و يشاورو عليها ويقولو غندورة

والبيه فرحان واه فاشخ ضبه

شكله تعبان و الفكره اه هده

بقى مش مكسوف يا عبيط انت هى

خيبان هيمان ماشى ورا وليه

سحباك دلدول على طول كده وهفيه

يا اخى مرة استرجل واشرب فى بريل

ولا يوم تتحنجل دا الكيف بيذل

راح تكسب إيه لو تخسر نفسك

بإيديك اتحرر حطم بقى يأسك

فكر فى ولادك وفى بكرة بتاعهم

وكفاية عنادك  كده هاتضيعهم

مين منهم فادك اقف شجعهم

وارفض اسيادك ولاتبقى تبعهم

السر

أيتها السر الممزوجة أزلا بالروح 

كم أخشى أن ينفلت العمر و لست أبوح

لك وحدك انت بالسر المخفى المجروح

القابع خلف جدار الصمت يأن كطير مذبوح

يترقب ان تتغير مفاهيم الحب لعشق ممدوح

لا يخجل من إعلانه يوما كالورد بالعطر يفوح

ترانيم تتراقص طربا و طيور بالشجن تنوح

تتبدل لهجات الدنيا بمعان ينطلق جَواد مكبوح

كغريق يسبح مندفعا للنجدة فى الافق تلوح

اوتدرك معنى عزيز الصمت ام ينقصه شروح

ام أنى قدمت هباء لك هذا دم قلبى المسفوح

 

زمن الفيسبوك

أنا أعرف واحد أستاذ فى الكذب

و كبير فى الحزب

وعامل جمعية

قال إيه خيرية

بيلم الناس بأغانى وطنية

والناس تتجمع معذورة

نفسها تتلمع فى الصورة

واللى ما يشترى منهم يتفرج

اوعى تصدقنى ما انا أصلى بهرج

و الست الهانم

عمالة تتصور بالأعلام

طالعة على سلالم

استاذة نفاق ولا أحلى كلام

وبقينا عايشين فى مصيبة كبيرة اسمها فيسبوك

كله بيغنى طب مين راح ينتج

طب حد هاينجح ... اسمح لى أشك

سلطة نفايات

يا دنيا غريبة ورتنا 

العجب

بأفعال مريبة وقلة أدب

على كل صنف وعلى كل لون

قابلت فى حياتى وشفت الجنون

مقاول يحاول يكون فى السليم

وينسى بهبله تاريخه القديم

مخالفات بيبنى ويدى فى رشاوى

ويقولك يا إبنى د زمن البلاوى

وعيل صغير عامل فيها بيه

و بنت الغلابة هاتسكن شلايه

و واحد حرامى 

عاملك عصامى

يقول لك تجارتى 

عاملها بشطارتى

اياك تحترمهم شوية عيال

فلوسهم حرام بشغل الشمال

وشفت حاجت تشل النفوخ

موظف تمللى بيمسح فى جوخ

و يكره صاحبه ويضحك لهم

ولو يحتاجو له بعيد عنهم

و واحد تشوفه يذم فى غيره

ولو غيره قابله يغنى لخيره 

يقول تأقلم مع وضع حالى 

وهو منافق وله عقل خالى

حقيقى كلام يزعل كتير 

لكنه فى مرة يصحصح ضمير

واقول فى ختامى مازال لسه خير

ولو عجبك كلامى ابقى اعمل له شير

خلاصة الحديث فى مبادئ الترقى الحديث

يا اللى انتو ناوين ع الترقى حاقول لكم كلام خطير

لو كنتو عايزين فى الوظيفة توصلو لمكان كبير

اسمع نصيحة سمعتها تسور ودانى كما النفير 

قالها لى يوم واحد صاحبته بس اكتشفت قد ايه طلع حقير

قال لى تكبر اوعى تزعل  لو حصل فى يوم تغيير 

يجى وزير يروح وزير 

او كان مدير أصله غفير 

ميهمكوش كلام كتير

أرقص وأتحنجل للمدير

وأقع وإتشنكل  حتى تطير

حبوب نفاق تسفها توصلك تملى فوق

إيه يعنى لما تحرسو و تبقى كلب ناقصه طوق

لكنهم حايقربوك  وللكراسى يرشحوك

حايبهدلوك و ينفخوك 

لو جيت فى مرة وسبتهم مش حايسيبوك 

و فى النهاية مش حاتكسب حتى نفسك فى الوظيفة وكله زفت

واوعاك تروح فى مرة تشكى او تلوم وتقول قرفت

ما هو طرشى فى اوله و فى النهاية مربى لفت

اسمعو منى

اسمعو منى  يا لأحباب

راح احكى لكم ع النواب

ظهرو ولفو ولما ادفو ... الكل أه غاب

روحنا ندور عل الأعتاب

حدش شاف ولا واحد منهم هنا شباب

مش لاقينهم ولا عارفينهم فص الملح اتبخر داب

يمكن بيمخمخو لحياتنا ولمصالحنا والعيشة هباب

يمكن بيخططو للدورة بعد الثورة شبابها ما شاب

مين ينجدنا د احنا احتارنا لما اخترنا ولقينا سراب

وفى مطرحنا مين ينصحنا وينبهنا ويقول اسباب

احنا طهقنا لما زهقنا من حضراتهم وكفاية عتاب 

بس يا خوفى لو تتكرر نفس الخدعة حاتسود تانى شريعة الغاب

فاصحى وفوق يا مواطن فكر لإختيارتك وكفاية عذاب

واوعى بإيدك تختار سيدك يوم تحتاجه تلاقيه كشر عن انياب

واياك تيأس او تستسلم وتقول مرة نصيب غلاب

ارجع تانى و اختار صح عشان ترتاح وكفاية غياب

عندك معايير تختار بيها اوعى تسيبها زى ما غيرك قبلك ساب

خد بالك م اللى بيسعى بقاله سنين واللى بيصرف بالملاين واللى يغنى عل المساكين والاخر يطلع كداب

هى اصلها مش بالرش ولا بالغش و لا بسلام وبضحكة وش اوعاكو تزعلو د احنا صحاب

رقصة على مذبح الكرامة

جات الحزينة للصوان 

عشمانة يوم فى حياتها تفرح

بالإيجار ترقص يا عينى طمعوها بكام جنيه

لما شافتنى دمعت قالت بحرقة أنفع يا بيه

م أنا أصلى عندى يا سيدى حالة

أمى محتاجة الإعالة 

وكام ولد على كام بنية

فاتهم لى ابوهم علشان قضية 

لما استلف ومضى الشيكات 

علشان هنية

بنتى الكبيرة 

جوزتها الصيف اللى فات

وجوزها مات  ...... ولا خدنا دية

وأما قلت افرش ابيع حبة طماطم او خضار

جريو ورايا بالعصايا

 تقولش مطلوبة لعدالة او يجوز عليا تار

واما قالو اقعدو فى بيوتكو خافو م الكرونا

نسيو النهاردة وجم بسرعة يطلعونا ... يحشدونا

فى الشوارع عند اللجان جمعونا 

ع النواصى يزحمونا

فوق دماغنا طبلو و رقصونا

نرقص بدل ما كنا نندب ونشيل تراب ويبهدلونا

نرقص شوية وبعدها هايرجعونا 

بالهدايا عبوهالنا كلها جوه كرتونة وهوب هيلا شيلونا

وليه تلوم على طير يفرفر مدبوح جريح وتقول ده رقص

وكلنا يا بيه بيرقص بس بطريقته

و كله نقص

ما بعد عواصف الربيع

كانت غابة رتيبة توحشت حيواناتها المتوحشة اكثر من المعتاد و إستكانت الضعيفة منها اكثر من مثيلاتها فى باقى الغابات المجاورة .

مرت سنون عديدة وحدثت بعد عقود من الجمود جملة من الكوارث الطبيعية فى ربيعها البارد

ثار البركان الراقد يدفعه غليان فى عروق السكان مصاحبا لزلزال بدقات قلب المساكين الذين تحملو الكثير حطم مقاييس ريختر و بدت مع انفاسهم المتصاعدة عاصفة تتجه نحو الغابة مسرعة  البعض ينتظر حدوث هذا الإعصار لإحداث أكبر قدر من التغير فى تلك الغابة الرتيبة المليئة بالأكواخ المتهالكة ولكن بعد ان مر هذا الربيع الأنكد

وبعد أن هدأت العاصفة وجدنا السكان إنقسمو الى اصناف متعددة كما لو كانت لبستهم ارواح بعض من حيوانات الغابة فمنهم متلون كالحرباء ومنهم اهوج كالثور ومنهم ماكر كالثعلب ومنهم قافز كالقرد ومنهم ابله وغبى ومنهم متوحش انتهازى ومنهم واضع رأسه فى الرمل .

وبدء البعض منهم يحاول أن يعيد بناء نفس الأكواخ كما كانت خربة ويعيد سكانها من الأوثان او ان يتقمص شخصياتهم ويقاوم كافة أشكال التغيير 

والبعض يحاول بحماس او رعونة هدم الغابة او إحراقها تماما والعودة للحظة اشبة ببداية الخليقة وإعادة مراحل التطور والأحداث التاريخية 

وقلة عاقلة تحاول محو آثار الإعصار و الأكواخ واوثانها معاً وبناء ما هو اعظم منها  واكثر ثباتا وبقاء بل وتحويل الغابة الى جنة والتوسع فى إنشاء غيرها فى كل إتجاه